Pinapalawak ng College of Education (CEd) ng Isabela State University–Cauayan Campus ang ugnayang pang-akademiko nito sa ibang bansa sa pamamagitan ng pakikipaghuntahan sa Faculty of Teacher Training and Education (FTTE) ng Universitas Mahasaraswati Denpasar (Unmas Denpasar), Indonesia, sa isang online meeting, Agosto 19.

Nakiisa sa pagpupulong ang mga kinatawan mula sa pamunuan at mga programa ng CEd, kabilang sina Prof. Liezl Joy L. Quilang, PhD, Director for Academic Affairs; Assoc. Prof. Ryan P. Salviejo, Director for Public Relations, External Linkages, and International Affairs; Prof. Lorelei C. Tabago, Director for Research and Development; Assoc. Prof. Nancy G. De Leon, Director for Extension and Training Services; Prof. Donabel A. Dumelod, EdD, Dean of the College of Education; Assoc. Prof. Ariane Milagrosa T. Pantaleon, Bachelor of Secondary Education (BSEd) Program Chair; at Asst. Prof. Allan R. Leal, Bachelor of Elementary Education (BEEd) Program Chair.

Kinatawan ng FTTE Unmas Denpasar ang Dean, Vice Dean, Head, at Secretary ng kanilang mga study programs, kasama ang mga kinatawan ng International Relations Unit at Vice Rector ng unibersidad.

Nakatuon ang talakayan sa pagtukoy ng mga larangan na maaaring maging pundasyon ng akademikong pakikipagtulungan sa pagitan ng dalawang institusyon. Kabilang dito ang teacher education, language and literacy education, educational technology, research and publication, community engagement, at faculty at student academic activities.

Bukod sa mga gawaing akademiko, kabilang din sa mga maaaring paunlarin ang pagpapalitan ng kaalaman at kultura upang mapalakas ang pananaw ASEAN sa edukasyong pangguro at mapalawak ang kaalaman ng mga guro at mag-aaral sa mga karanasan at inobasyon sa edukasyon sa Pilipinas at Indonesia.

Ang pagpupulong ay bahagi ng paunang hakbang ng ISU Cauayan CEd at FTTE Unmas Denpasar sa pagtukoy ng mga magkakatugmang interes at posibleng konkretong gawain. Sa pamamagitan ng patuloy na koordinasyon, layunin ng dalawang institusyon na tuklasin ang mga oportunidad para sa research collaboration, knowledge exchange, faculty at student engagement, at iba pang akademikong inisyatiba.

—

#OneTeamBamboo | #BrightISU | #OneISU | #ISUlong | #ISUEducation | #TatakISU | #ISUAcademicExcellence | #ISUResearchExcellence | #ISUQualityAndRelevance | #ISU4Innovation

Alamin pa ang tungkol sa Pamantasang Pampamahalaan ng Isabela–Cauayan Kampus sa pamamagitan ng pagbisita sa aming opisyal na website: https://isucauayan.edu.ph